مسودة للمراجعة القانونية
الشروط والأحكام
باختصار
- كعب سوق بيجمع مصانع الأحذية وتجار الجملة في مصر. البيع بيتم بين المصنع والتاجر، وكعب مش طرف في البيع ولا بيمسك فلوس.
- الطلب بيتأكد لما المصنع يوافق عليه ويحدد ميعاد التجهيز. التأكيد ده هو الاتفاق: الموديلات، والسعر، وأي تعديل اتسجّل في محادثة الطلب.
- التاجر مابيدفعش حاجة لـكعب. المصنع بيدفع عمولة على الطلب المؤكد، وباقة سنوية لو اختار يظهر في التصفّح.
- النص العربي هو المعتمد، والقانون المصري هو اللي بيحكم.
1. مين يقدر يستخدم المنصة
المصانع وتجار الجملة في مصر، ومحلات التجزئة لما بابها يفتح. التسجيل برقم موبايل وكود على واتساب، واسم النشاط ونوعه والمحافظة، من غير مستندات. حساب واحد لكل رقم، وصاحب الحساب مسؤول عن اللي بيتعمل منه. فريق كعب ممكن يزور المصنع ويحط علامة «كعب زار المصنع» على صفحته.
2. كعب مش البائع
عقد البيع بين المصنع والتاجر. كعب بيسجّل الطلب والمحادثة والاتفاق وتأكيد الاستلام والدفع، وبيطلّع «فاتورة شراء» باسم التاجر للمصنع، وهي ليست فاتورة ضريبية: الفاتورة الإلكترونية بتاعة المصنع هي الفاتورة القانونية للبيع. الفلوس بتروح من التاجر للمصنع مباشرة، وكعب مابيستلمش ولا بيحوّل فلوس بين الطرفين.
3. الطلب والتأكيد والاتفاق
كل طلب من مصنع واحد، وبيسجّل السعر اللي اتطلب بيه. التاجر يقدر يلغي قبل التأكيد. المصنع يقدر يعتذر بسبب مكتوب، والكمية بترجع المخزون والمبلغ بيرجع لحد الآجل لو كان آجل. قبل التأكيد، أي طرف يقدر يقترح تعديل في محادثة الطلب (الكراتين، السعر، كرتونة هدية، عربون، ميعاد)، والطرف التاني يوافق أو يرفض؛ الموافقة بتتسجّل على الطلب، وكل نسخة بتتحفظ، وفاتورة الشراء بتتعاد. تأكيد المصنع بالزرار هو الاتفاق النهائي على الموديلات والسعر والتعديلات.
4. الأسعار والدفع والآجل
الأسعار يحددها المصنع للكرتونة، كاش وآجل، وبيشوفها تجار الجملة المسجّلين بس. طرق الدفع اللي المصنع بيقبلها مكتوبة على صفحته. الآجل قرار المصنع لكل تاجر، بحد ومدة بيحددهم هو، ومفيش فوايد ولا غرامات من كعب. الدفعات بتتسجّل على المنصة وبيأكدها الطرفين، والسجل ده هو المرجع لو حصل خلاف.
5. رسوم كعب
- التاجر مابيدفعش حاجة لـكعب: لا اشتراك ولا عمولة.
- المصنع بيدفع عمولة على كل طلب يأكده: [12] ج.م للجوز لحد سعر [300] ج.م للجوز، وفوقه [4]٪ من سعر الكرتونة. عملاء المصنع اللي جم من لينكه («عميلي») بخصم [40]٪ دايمًا، والشارة بتتثبت مع أول طلب. الأرقام الحالية مكتوبة على صفحة «للمصانع».
- العمولة بتستحق مع التأكيد وبتيجي في فاتورة شهرية، ومابتتغيرش بإلغاء ولا استرداد ولا استبدال بعد التأكيد. التصحيح الوحيد لغلطة من كعب نفسه، بسبب مكتوب وموافقة شخص تاني من الفريق.
- الباقة السنوية اختيارية: الصفحة المجانية بتفتح من لينك المصنع بس، والباقات بتضيف الظهور في التصفّح والمواسم والبانرات. أسماء الباقات وأسعارها: [اسم الباقة] و[السعر في السنة].
6. المحادثة داخل كعب
لكل طلب محادثة واحدة بين المصنع والتاجر وفريق كعب، و«اسأل المصنع» بيفتح محادثة قبل الطلب. كعب بيحفظ المحادثات مع الطلب لمدة [المدة]، وفريق الدعم بيقرأها لما يحتاج يتابع طلب أو يحكم في مطالبة. أرقام الموبايل مش بتظهر للطرف التاني، وواتساب بيبعت تنبيهات بس بلينك للمحادثة.
7. المطالبات والمرتجعات
المطالبة (عيب صناعة، نقص في العدد، مقاسات مش زي النسبة، مختلف عن الصور، تأخير) بتتفتح من صفحة الطلب لحد 7 أيام من الاستلام، والمصنع بيرد، وفريق كعب بيحكم خلال 24 ساعة لو الطرفين ماتفقوش: استبدال أو استرداد أو تقسيم أو لصالح المصنع. مرتجع الكراتين المقفولة حسب سياسة كل مصنع المكتوبة على صفحته. التفاصيل في صفحة المطالبات والمرتجعات.
8. التعامل من خلال المنصة
التاجر اللي كعب عرّفه على المصنع («من المنصة») بتفضل طلباته مع المصنع ده من خلال المنصة لمدة 12 شهر من أول طلب. عملاء المصنع اللي جابهم بنفسه من لينكه بيتحسبوا «عميلي» وعمولتهم أقل. الطلبات اللي على المنصة بس هي اللي بتبني مستوى التاجر وسجل التعامل وقرارات المطالبات.
9. الماركات والصور
ممنوع عرض موديل عليه لوجو أو اسم ماركة تانية إلا لو المصنع وكيل معتمد ليها. الموديل بيتوقف لحد ما المصنع يثبت التوكيل، ومابيتمسحش. ماركة المصنع نفسه مكتوبة على ملفه ومش بتتوقف. الصور لازم تكون للموديل نفسه، والمطالبة «مختلف عن الصور» بتتحسب ضد المصنع لو ثبتت.
10. إيقاف الحساب
الحساب ممكن يتوقف لو فيه مخالفة للشروط أو بيانات غير صحيحة أو سلوك بيضر الطرف التاني، بقرار من شخصين من فريق كعب وبسبب مكتوب بيوصل لصاحب الحساب. صاحب الحساب يقدر يراجع القرار مع فريق الدعم.
11. القانون والاختصاص
الشروط دي بيحكمها القانون المصري، والنص العربي هو المعتمد. أي نزاع مع كعب نفسه بيتحل أولًا بالتفاهم مع فريق الدعم، وبعدها [جهة الاختصاص]. المنصة تشغّلها [اسم الشركة]، سجل تجاري [رقم السجل]، [العنوان].