مسودة للمراجعة القانونية
سياسة الخصوصية
إيه اللي بنجمعه
رقم الموبايل، واسم النشاط ونوعه والمحافظة، والطلبات والدفعات اللي بتتسجّل على المنصة، ومحادثات الطلبات، والموديلات اللي بتحفظها والمصانع اللي بتتابعها. مفيش مستندات بتتطلب عند التسجيل.
بيانات المصنع
حجم الإنتاج ونوع العملاء مش بيظهروا لأي حد على المنصة. أسعار الجملة بيشوفها تجار الجملة المسجّلين بس، والمخزون بأرقامه بيشوفه التاجر وقت الطلب. المصانع التانية مابتشوفش أسعارك ولا عملاءك ولا الآجل اللي بتديه.
بيانات التاجر
رقمك مش بيظهر للمصنع: الكلام بيتم في محادثة الطلب جوه كعب. المصنع بيشوف اسم نشاطك ومدينتك وطلباتك معاه بس، وشارة «عميلي» أو «من المنصة» عنده. مستواك ونسبة التزامك بالمواعيد بيشوفها مصنع لما توافق انت على كده.
محادثات الطلبات
كعب بيحفظ كل محادثة مع طلبها، بما فيها الصور، لمدة [المدة] من آخر رسالة. بيقرأها الطرفين، وفريق الدعم في كعب لما يتابع طلب أو يحكم في مطالبة. الرسايل ماتتباعش ولا تتبعت لحد تالت.
الإيصالات والملفات
إيصالات الدفع وصور المحادثات وملفات الاستيراد بتتخزن في مكان خاص، وبيشوفها صاحب الحساب والطرف اللي بتخصه وفريق كعب بس.
الإشعارات وواتساب
إشعارات الطلبات والمحادثات والمطالبات والفواتير بتوصل على واتساب لأنها مرتبطة بطلب أو قرار عليك، وكل إشعار بلينك للصفحة بتاعته. رسايل التسويق (الموديلات الجديدة والمواسم) بتوصل للي وافق عليها بس، بعدد محدود في الأسبوع، وتقدر توقفها في أي وقت من صفحة الإشعارات.
المساعد الذكي
كعب بيستخدم مساعد ذكي على الخادم لقراءة إيصالات الدفع وتحويل صور الكتالوج لمسودات والبحث بالصورة. الصورة بتتبعت لمزوّد الخدمة عشان المهمة دي بس، ومابتتخزنش عنده بعدها.
حقوقك
تقدر تطلب نسخة من بياناتك، أو تصحيحها، أو قفل الحساب من فريق الدعم. بعد قفل الحساب بنحتفظ بسجل الطلبات والفواتير للمدة اللي القانون بيطلبها [المدة القانونية]، ومش أكتر. للتواصل: [بريد كعب للخصوصية].